Алматыда атыс болып, бес адам қаза тапты. Екеуі – полиция қызметкері

Алматының “Ақбұлақ” мөлтекауданында атыс болып, бес адам қаза тапты. Бұл жөнінде қаланың полиция департаменті хабарлады.
Полиция департаментінің мәліметі бойынша, сағат 17-де Алатау ауданы, “Ақбұлақ” мөлтекауданында 1967 жылы туған Д. есімді азамат үйден шығару туралы сот шешімін орындатуға келген сот орындаушыларына, учаскелік полиция инспекторлары мен төтенше жағдай департаменті қызметкерлеріне оқ атқан.
Оқиға кезінде бес адам қаза тапты, олардың екеуі – қызметтік міндетін атқарып жүрген полиция қызметкерлері: полиция майоры Дархан Сүлеев пен полиция капитаны Нұрбол Байғазиев. Бұған қоса сот орындаушы М.Әбенов пен екі адам оққа ұшқан.
“Күдіктінің қаруы тартып алынып, қамалды. Жағдай бақылауға алынды. Қылмыстық іс қозғалды. Тергеу жүріп жатыр” делінген Алматы қалалық полиция департаментінің хабарламасында.