Реформалардан кейін өткенге қайта оралмаймыз – Тоқаев

Президент Қасым-Жомарт Тоқаев елдегі өзгерістер әлі жалғасатынын және мемлекеттің сипатын толық өзгертетінін мәлімдеді. Айтуынша, екі жылға да жетпейтін аз уақытта елімізде іске асырылған реформалар халықтың саяси сана-сезімін едәуір өзгертті. “Енді жұртымыз мемлекетті басқарудың бұрынғы тәсілін қайтаруға жол бермейтініне сенімім мол. Реформалардан кейін өткенге қайта оралмаймыз. Өзгерістер әлі жалғасады және мемлекетіміздің сипатын толық өзгертеді”, – деді Тоқаев. Бірақ реформаны жүзеге асырғанда, ең алдымен, ішкі саяси тұрақтылықтың маңыздылығын естен шығармауымыз керек, дейді ол. “Әйтпесе Қазақстанның мемлекеттілігіне зор қауіп-қатер төнуі және оның салдары ұлт болашағы үшін өте ауыр болуы мүмкін. Сондықтан мен әрбір азамат заң мен тәртіпті сақтауы керек деп үнемі айтып жүрмін”, – деп жалғастырды сөзін мемлекет басшысы.