Қазақстанда қант қызылшасы алқабын ұлғайту жоспарланып отыр

Бұл туралы ауыл шаруашылығы министрлігінің баспасөз қызметі хабарлады. Министр орынбасары Әбілхайыр Тамабек Жамбыл облысының Меркі, Жамбыл, Байзақ және Талас аудандарына барып, жергілікті шаруалармен кездесті. Жамбыл облысы – Қазақстандағы қант қызылшасын өсіретін негізгі өңірлердің бірі. Қант қызылшасы алқабының азаюына шығынның көптігі мен экономикалық тиімсіздігі, ылғалмен қамтамасыз ету проблемасы; шаруаларды техникалық жабдықтау мәселесі себеп болған. Сондай-ақ өткен ғасырдың 30-шы жылдары салынған қант зауыттары әбден тозған. Зауыттардың технологиялық жабдықтарын жаңғырту үшін көп инвестиция қажет. “Фермерлердің проблемалары мен ұсыныстарын назарға ала отырып, ауыл шаруашылығы министрлігі қант саласын жаңғырту жоспарын пысықтап жатыр”, – деп мәлімдеді ведомство.