Жазда қолдануға болмайды – полиция көлік жүргізушілерге ескерту жасады

Шығыс Қазақстан облыстық полиция басқармасы жаз айларында қысқы шинамен, яғни тікенегі бар доңғалақпен жүруге болмайтынын ескертті, деп хабарлайды Sputnik Қазақстан. Қазақстанның жол жүру ережесіне сәйкес, маусым мен тамыз айларында мұндай доңғалақты пайдалануға тыйым салынған. Оған қоса, Кеден одағының “Көлік қауіпсіздігі туралы” техникалық регламенті бойынша қысқы шинамен жүруге рұқсат жоқ. “Жолда шипі бар көлікті жүргізу өте қауіпті, өйткені тежегішті кенеттен басқан кезде тікенектер жолдың бетіне жабыспайды, сырғып кетеді. Ондайда көлікті тоқтатуға қажетті жол да, уақыт та ұзарады. Соның салдарынан жол апатының қаупі артады”, – дейді полицейлер. Әкімшілік құқықбұзушылық туралы кодексі бойынша 15 900 теңге көлемінде айыппұл қарастырылған.