Жеке шот ашуға міндеттейді: елде мобильді аударымдар заңмен реттеледі

Фото: Sputnik Қазақстан

Парламент сенаты кәсіпкерлерді мобильді аударымдар үшін жеке шот ашуға міндеттейтін заңды қабылдап, президенттің қол қоюына жолдады, деп хабарлайды Sputnik Қазақстан. Заң жобасын парламент депутаттары әзірлеген. Қаржы және бюджет комитетінің мүшесі Ғұмар Дүйсембаевтың айтуынша, пандемия кезінде шағын және орта кәсіпкерлер мобильді аударымдарды бүкіл жерде пайдалана бастады. Алайда ол тек жеке тұлғалар арасындағы транзакцияларға арналған. Бұл мәселені заңнамалық реттеу мақсатында “мобильді төлемдер” түсінігі енгізілді. Сонымен қатар кәсіпкерлер бизнеске арнап жеке шот ашуға міндеттеледі. Клиенттер де алған тауардың немесе көрсетілген қызмет ақысын төлегенде, ақшаны осы шотқа аударады. Банктер тиісті мәліметтерді мемлекеттік кірістер органдарына береді.