Сенат шетелдік көлікті 200 мың теңгеге тіркеуге мүмкіндік беретін заңды қабылдады

Фото: pixabay.com

Сенат шетелдік көліктерді заңдастыру бойынша заң жобасын қабылдады. Құжат президенттің қол қоюына жіберілді, деп хабарлайды Sputnik Қазақстан. Заң бойынша Салық колексіне өзгеріс енгізіледі. Оған сәйкес, Қазақстанға 1 қыркүйекке дейін кірген шетелдік көліктерді бірыңғай алыммен тіркеп, заңдастыруға болады. Оның көлемі – 200 мың теңге. “2022 жылғы 1 қыркүйекке дейін әкелінген автомобильдерді заңдастыру мақсатында алғашқы тіркегені үшін бірыңғай алымды белгілеу 300 мыңға жуық автокөлікті есепке қоюға жағдай жасайды, сондай-ақ осы автомобильдер бойынша көлік құралдарына салынатын салық жергілікті бюджетті толықтырады”, – деді сенатор Ғұмар Дүйсембаев. Айта кетері, бұған дейін ішкі істер министрлігі шетелдік көліктерді жеңілдетілген тәртіппен тіркеу шаралары қашан басталатынын хабарлаған.